اسلام میں حقوقِ ہمسایہ: ایک صالح اور پُرامن معاشرے کی تشکیل

محمد توقیر رضا

البرکات اسلامک ریسرچ اینڈ ٹریننگ انسٹی ٹیوٹ، علی گڑھ

انسان جب اپنے گھر سے باہر نکلتا ہے اور دروازہ بند کرکے اطمینان کے ساتھ اپنی منزل کی طرف روانہ ہوتا ہے تو اسے اپنے گھر کی چار دیواری کے متعلق ایک طرح کا تحفظ محسوس ہوتا ہے۔ لیکن اسلام اس سے ایک نہایت اہم سوال کرتا ہے کہ کیا تمہارا پڑوسی بھی تمہاری وجہ سے خود کو محفوظ محسوس کرتا ہے؟ کیا اسے تمہارے رویّے، تمہاری گفتگو اور تمہارے طرزِ عمل سے کسی قسم کی تکلیف تو نہیں پہنچتی؟

یہ سوال بظاہر معمولی معلوم ہوتا ہے، لیکن حقیقت یہ ہے کہ ایک صالح اور پُرامن معاشرے کی تشکیل میں اس کی بڑی اہمیت ہے۔ اسلام نے انسانی زندگی کے ہر پہلو کے لیے جو جامع تعلیمات عطا کی ہیں، ان میں حقوقِ ہمسایہ کو بھی نہایت بلند مقام حاصل ہے۔ یہ محض چند معاشرتی آداب یا اخلاقی تقاضوں کا نام نہیں، بلکہ ایک ایسی دینی اور انسانی ذمہ داری ہے جس کا تعلق ہمارے ایمان، کردار اور معاشرتی زندگی سے براہِ راست ہے۔

قرآنِ کریم میں حقوقِ ہمسایہ کی اہمیت

حقوقِ ہمسایہ کی اہمیت کا اندازہ اس بات سے لگایا جا سکتا ہے کہ اللہ تعالیٰ نے قرآنِ کریم میں عبادتِ الٰہی، والدین کے ساتھ حسنِ سلوک، رشتہ داروں، یتیموں اور مسکینوں کے حقوق بیان کرنے کے بعد پڑوسیوں کے ساتھ اچھا برتاؤ کرنے کا حکم دیا ہے۔ چنانچہ سورۂ نساء میں ارشادِ باری تعالیٰ ہے: ترجمہ: "اور اللہ کی عبادت کرو اور اس کے ساتھ کسی کو شریک نہ ٹھہراؤ، اور والدین کے ساتھ بھلائی کرو، نیز رشتہ داروں، یتیموں، مسکینوں، قرابت دار پڑوسی اور اجنبی پڑوسی کے ساتھ بھی اچھا سلوک کرو۔" (النساء: 36)

اس آیتِ مبارکہ میں حقوق و فرائض کی جو ترتیب بیان ہوئی ہے، وہ اپنے اندر بڑی حکمت رکھتی ہے۔ سب سے پہلے اللہ تعالیٰ نے اپنی عبادت اور توحید کا حکم دیا، اس کے بعد والدین اور رشتہ داروں کے حقوق بیان فرمائے، پھر یتیموں اور محتاجوں کا ذکر کیا اور اس کے فوراً بعد پڑوسیوں کے ساتھ حسنِ سلوک کی تاکید فرمائی۔ اس ترتیب سے حقوقِ ہمسایہ کی اہمیت بخوبی واضح ہوتی ہے۔ گویا پڑوسی کے ساتھ اچھا برتاؤ کوئی اختیاری نیکی نہیں، بلکہ ایک اہم دینی اور اخلاقی ذمہ داری ہے۔

احادیثِ مبارکہ میں بھی پڑوسی کے حقوق کی غیر معمولی تاکید ملتی ہے۔ حضرت عائشہ رضی اللہ عنہا سے روایت ہے کہ رسول اللہ ﷺ نے ارشاد فرمایا:

مَا زَالَ جِبْرِيلُ يُوصِينِي بِالْجَارِ حَتَّى ظَنَنْتُ أَنَّهُ سَيُوَرِّثُهُ۔

ترجمہ: ’’حضرت جبریل علیہ السلام مجھے مسلسل پڑوسی کے بارے میں وصیت کرتے رہے، یہاں تک کہ مجھے گمان ہونے لگا کہ شاید وہ اسے وارث بھی قرار دے دیں گے۔‘‘ (صحیح البخاری، حدیث: 6014)

ذرا غور کیجیے کہ اسلام میں وراثت کا حق مخصوص رشتہ داروں کو حاصل ہے، لیکن پڑوسی کے حقوق کے بارے میں حضرت جبریل علیہ السلام کی مسلسل تاکید کا اثر یہ تھا کہ رسول اللہ ﷺ کو گمان ہونے لگا کہ شاید پڑوسی کو بھی وراثت میں حصہ دار بنا دیا جائے گا۔ اس سے اندازہ ہوتا ہے کہ اسلام میں پڑوسی محض وہ شخص نہیں جو ہمارے گھر کے قریب رہتا ہو، بلکہ اس کے ساتھ ایک ایسا تعلق قائم ہوتا ہے جو دینی، اخلاقی اور انسانی ذمہ داریوں کا تقاضا کرتا ہے۔

حقوقِ ہمسایہ کے تین بنیادی پہلو

حقوقِ ہمسایہ کا مطالعہ کیا جائے تو اس کے تین اہم پہلو سامنے آتے ہیں: پڑوسی کو ہر قسم کی تکلیف سے محفوظ رکھنا، اس کی ضروریات اور مشکلات کا خیال رکھنا، اور مذہب و ملت کے اختلاف کے باوجود اس کے حقوق ادا کرنا۔

1۔ پڑوسی کا تحفظ اور اسے اذیت سے بچانا

اسلام نے پڑوسی کے حقوق میں سب سے زیادہ جس بات پر زور دیا ہے، وہ یہ ہے کہ اسے کسی بھی قسم کی تکلیف نہ پہنچائی جائے اور وہ اپنے پڑوس میں مکمل اطمینان اور تحفظ محسوس کرے۔

چنانچہ رسول اللہ ﷺ نے ایک موقع پر تین مرتبہ قسم کھا کر ارشاد فرمایا:

وَاللّٰهِ لَا يُؤْمِنُ، وَاللّٰهِ لَا يُؤْمِنُ، وَاللّٰهِ لَا يُؤْمِنُ۔ یعنی خدا کی قسم وہ مومن نہیں۔ تو 

صحابۂ کرام رضی اللہ عنہم نے عرض کیا: یا رسول اللہ! کون شخص؟

آپ ﷺ نے ارشاد فرمایا: الَّذِي لَا يَأْمَنُ جَارُهُ بَوَائِقَهُ۔

ترجمہ: ’’وہ شخص جس کا پڑوسی اس کی شرارتوں اور تکلیف دہ حرکتوں سے محفوظ نہ ہو۔‘‘ (صحیح البخاری، حدیث: 6016)

اس حدیثِ مبارکہ میں رسول اللہ ﷺ نے پڑوسی کو تکلیف پہنچانے والے شخص کے ایمان کی نفی فرمائی ہے۔ اس سے اندازہ لگایا جا سکتا ہے کہ اسلام کی نظر میں پڑوسی کو اذیت پہنچانا کتنا سنگین عمل ہے۔

پڑوسی کو تکلیف پہنچانے کا مطلب صرف یہ نہیں کہ اس کے گھر کے سامنے گندگی پھیلائی جائے یا اس کے راستے میں رکاوٹ پیدا کی جائے، بلکہ اس کی نجی زندگی میں مداخلت کرنا، اس کے عیوب تلاش کرنا، اس کی غیبت کرنا، بلاوجہ شور و غل کرکے اسے پریشان کرنا اور اپنے تکبر و بدخلقی سے اس کا جینا دشوار بنا دینا بھی اسی میں شامل ہے۔

حقیقت یہ ہے کہ اگر ہمارا پڑوسی ہماری وجہ سے بے سکونی اور خوف کا شکار ہے تو ہمیں اپنے کردار اور اپنے طرزِ عمل کا سنجیدگی سے جائزہ لینے کی ضرورت ہے۔

2۔ پڑوسی کی ضروریات کا خیال رکھنا

اسلام صرف اس بات پر اکتفا نہیں کرتا کہ ہم اپنے پڑوسی کو تکلیف نہ پہنچائیں، بلکہ اس سے آگے بڑھ کر اس کی ضروریات کا خیال رکھنے اور اس کی مشکلات میں کام آنے کی بھی تعلیم دیتا ہے۔

رسول اللہ ﷺ نے ارشاد فرمایا:

لَيْسَ الْمُؤْمِنُ الَّذِي يَشْبَعُ وَجَارُهُ جَائِعٌ إِلَى جَنْبِهِ۔

ترجمہ: ’’وہ شخص کامل مؤمن نہیں جو خود تو پیٹ بھر کر کھائے، جبکہ اس کے پہلو میں رہنے والا پڑوسی بھوکا ہو۔‘‘ (الأدب المفرد، حدیث: 112)

یہ حدیثِ مبارکہ اسلامی معاشرت کے ایک نہایت اہم اصول کی طرف رہنمائی کرتی ہے۔ اسلام ہمیں یہ احساس دلاتا ہے کہ ہماری ذمہ داریاں صرف اپنی ذات اور اپنے اہل و عیال تک محدود نہیں، بلکہ ہمارے آس پاس رہنے والے لوگ بھی ہماری توجہ اور ہمدردی کے مستحق ہیں۔

اگر ہمارے گھر میں کھانے پینے کی فراوانی ہو، ہمارے دسترخوان پر انواع و اقسام کے کھانے موجود ہوں، لیکن ہمارے پڑوس میں کوئی خاندان فاقہ کشی پر مجبور ہو، تو ہمیں اپنی خوش حالی کے ساتھ اس کی محرومی کا بھی احساس ہونا چاہیے۔

اس تعلیم کا ایک اہم پہلو یہ بھی ہے کہ معاشرے سے غربت اور محرومی کے خاتمے کی ابتدا ہمارے اپنے گھر اور پڑوس سے ہونی چاہیے۔ محض بڑے بڑے دعوے، علمی گفتگو اور نیکی کی ظاہری صورتیں اس وقت تک بے معنی ہیں جب تک ہم اپنے آس پاس موجود ضرورت مندوں کی خبرگیری نہیں کرتے۔

3۔ مذہب و ملت سے بالاتر ہوکر پڑوسی کے حقوق کی ادائیگی

اسلام کی تعلیمات میں حقوقِ ہمسایہ کا ایک نہایت خوب صورت اور قابلِ توجہ پہلو یہ ہے کہ ان حقوق کا دائرہ صرف مسلمان پڑوسیوں تک محدود نہیں، بلکہ غیر مسلم پڑوسی بھی حسنِ سلوک اور اچھے برتاؤ کے مستحق ہیں۔

فقہائے کرام نے پڑوسیوں کے حقوق کے اعتبار سے تین صورتیں بیان کی ہیں:

پہلا پڑوسی وہ ہے جو مسلمان بھی ہو اور رشتہ دار بھی۔ اسے تین طرح کے حقوق حاصل ہیں: رشتہ داری کا حق، اسلام کا حق اور پڑوس کا حق۔

دوسرا پڑوسی وہ ہے جو مسلمان تو ہو، لیکن رشتہ دار نہ ہو۔ اسے اسلام اور پڑوس کے حقوق حاصل ہیں۔

تیسرا پڑوسی وہ ہے جو غیر مسلم ہو۔ اسے پڑوس کا حق حاصل ہے، جس کی رعایت اور ادائیگی ضروری ہے۔

اس تقسیم سے واضح ہوتا ہے کہ مذہب اور عقیدے کا اختلاف بھی پڑوسی کے بنیادی انسانی اور معاشرتی حقوق ختم نہیں کرتا۔

اس سلسلے میں حضرت عبداللہ بن عمرو رضی اللہ عنہما کا ایک نہایت سبق آموز واقعہ ملتا ہے۔ ان کے گھر میں ایک بکری ذبح کی گئی تو انہوں نے اپنے خادم سے دریافت کیا:

’’کیا تم نے ہمارے یہودی پڑوسی کو بھی اس میں سے دیا؟ کیا تم نے ہمارے یہودی پڑوسی کو بھی دیا؟‘‘

اس کے بعد انہوں نے رسول اللہ ﷺ کی وہ حدیث بیان کی جس میں پڑوسی کے حقوق کی مسلسل تاکید کا ذکر ہے کہ حضرت جبریل علیہ السلام آپ ﷺ کو پڑوسی کے بارے میں برابر وصیت کرتے رہے، یہاں تک کہ آپ ﷺ کو گمان ہونے لگا کہ شاید اسے وارث بھی بنا دیا جائے گا۔ (الأدب المفرد، حدیث: 1943)

یہ واقعہ اس بات کی روشن مثال ہے کہ صحابۂ کرام رضی اللہ عنہم نے تعلیماتِ نبوی کو کس قدر اہتمام کے ساتھ اپنی عملی زندگی میں جگہ دی تھی۔ ان کے نزدیک پڑوسی کے ساتھ حسنِ سلوک کا تعلق صرف مذہبی ہم آہنگی سے نہیں، بلکہ اس کے پڑوسی ہونے سے بھی تھا۔

عصرِ حاضر کا المیہ: ڈیجیٹل قربت، انسانی دوری

آج ہم ایک ایسے دور میں زندگی گزار رہے ہیں جس میں دنیا کے مختلف گوشوں میں رہنے والے لوگوں سے ہمارا رابطہ تو بہت آسان ہوگیا ہے، لیکن عجیب بات یہ ہے کہ ہمارے اپنے پڑوس میں رہنے والے لوگ بھی ایک دوسرے سے ناواقف ہوتے جا رہے ہیں۔

سوشل میڈیا پر ہمارے سیکڑوں اور ہزاروں دوست ہیں، ہم دنیا بھر کی خبروں سے باخبر رہتے ہیں، لیکن کبھی کبھی ہمیں یہ بھی معلوم نہیں ہوتا کہ ہمارے پڑوس والے گھر میں کون رہتا ہے، اس کے گھر کے حالات کیسے ہیں اور اسے کسی مدد کی ضرورت تو نہیں۔

بلند و بالا عمارتوں اور جدید رہائشی بستیوں میں رہنے کے باوجود انسان ایک دوسرے سے دور ہوتا جا رہا ہے۔ ہر شخص اپنی مصروفیات اور ڈیجیٹل دنیا میں اس قدر مگن ہے کہ اسے اپنے آس پاس کے لوگوں کی خبرگیری کا خیال ہی نہیں رہتا۔

یہ بے اعتنائی رفتہ رفتہ معاشرے میں اجنبیت، بداعتمادی، تنہائی اور بے حسی کو جنم دیتی ہے۔ حالاں کہ اسلام کی تعلیماتِ ہمسایہ ہمیں اس صورتِ حال سے نکلنے کا بہترین راستہ دکھاتی ہیں۔ اسلام ہمیں یہ سبق دیتا ہے کہ اپنی ذات اور اپنی محدود دنیا سے باہر نکلیں، اپنے آس پاس رہنے والوں کو پہچانیں، ان کے حالات سے باخبر رہیں اور ضرورت کے وقت ان کے کام آئیں۔

اچھے کردار کا حقیقی معیار

حقوقِ ہمسایہ کی اہمیت کو سمجھنے کے لیے ایک حدیثِ مبارکہ نہایت سبق آموز ہے۔

رسول اللہ ﷺ کی خدمت میں ایک ایسی عورت کا ذکر کیا گیا جو رات بھر نماز پڑھتی تھی، دن میں روزے رکھتی تھی اور کثرت سے صدقہ و خیرات بھی کرتی تھی، لیکن اپنی زبان سے پڑوسیوں کو تکلیف پہنچاتی تھی۔ آپ ﷺ نے اس کے بارے میں ارشاد فرمایا: لَا خَيْرَ فِيهَا، هِيَ مِنْ أَهْلِ النَّارِ۔ ترجمہ: ’’اس میں کوئی بھلائی نہیں، وہ جہنمی ہے۔‘‘

اس کے برعکس ایک دوسری عورت کا ذکر کیا گیا جو صرف فرض نمازیں ادا کرتی تھی اور معمولی صدقہ کرتی تھی، لیکن اپنے پڑوسیوں کو کبھی تکلیف نہیں پہنچاتی تھی۔ آپ ﷺ نے اس کے بارے میں فرمایا: هِيَ مِنْ أَهْلِ الْجَنَّةِ۔ ترجمہ: ’’وہ جنتی ہے۔‘‘ (مسند احمد، حدیث: 9675)

یہ حدیث ہمیں ایک نہایت اہم حقیقت سے آگاہ کرتی ہے کہ اللہ تعالیٰ کی عبادت کے ساتھ بندوں کے حقوق کی ادائیگی بھی بے حد ضروری ہے۔ محض عبادت کی کثرت، علمی قابلیت، بلند تعلیمی اسناد اور تحقیقی سرگرمیاں اس وقت تک ہمارے کردار کی تکمیل نہیں کرسکتیں جب تک ہمارا وجود دوسروں کے لیے راحت اور سکون کا ذریعہ نہ بن جائے۔

بالخصوص طلبہ، اساتذہ اور اہلِ علم کے لیے یہ بات قابلِ غور ہے کہ ہماری علمی ترقی اور تعلیمی کامیابی کا حقیقی فائدہ اسی وقت ہے جب اس کے اثرات ہمارے اخلاق و کردار میں بھی نمایاں ہوں۔ ہمارا علم ہمیں دوسروں کے حقوق کا احساس دلائے، ہماری عبادت ہمارے اندر حسنِ اخلاق پیدا کرے اور ہمارا کردار ہمارے پڑوسیوں کے لیے باعثِ اطمینان ہو۔

آئیے! ہم عہد کریں کہ اپنے پڑوسیوں کے ساتھ محبت، خلوص اور حسنِ سلوک سے پیش آئیں گے، ان کی خوشی اور غم میں شریک ہوں گے، ان کی ضروریات کا خیال رکھیں گے اور اپنی کسی بات یا عمل سے انہیں تکلیف نہیں پہنچائیں گے۔

ہمیں اپنے محلوں اور بستیوں کو محض اینٹ، پتھر اور سیمنٹ سے بنی عمارتوں کا مجموعہ نہیں، بلکہ محبت، اخوت، ہمدردی اور باہمی احترام کا ایسا گہوارہ بنانا ہے جہاں ہر شخص اپنے پڑوسی کے ہاتھ اور زبان سے محفوظ ہو۔

بلاشبہ یہی اسلام کی تعلیم ہے، یہی ایک اچھے مسلمان کے کردار کی پہچان ہے اور یہی ایک پُرامن و صالح معاشرے کی بنیاد ہے۔

شائع شدہ: ہفتہ, 14 نومبر، 2026 | 10:58 PM IST