نئی دہلی09 نومبر، دہلی کی سابق میئر شیلی اوبرائے نے پیر کو راجدھانی میں بڑھتی فضائی آلودگی پر بی جے پی حکومت کو تنقید کا نشانہ بنایا۔ انہوں نے کہا کہ دہلی کی ہوا میں زہر گھل چکا ہے اور ایئر کوالٹی انڈیکس (اے کیو آئی) خطرناک سطح پر پہنچ گیا ہے۔ شیلی اوبرائے نے حکومت سے مطالبہ کیا کہ وہ محض بیانات دینے کے بجائے آلودگی پر قابو پانے کے لیے ٹھوس اقدامات کرے۔
شیلی اوبرائے نے سوشل میڈیا پلیٹ فارم ایکس پر اپنی پوسٹ میں سوال اٹھایا کہ آخر دہلی کے لوگوں کو کب تک آلودہ ہوا میں سانس لینے پر مجبور ہونا پڑے گا۔ انہوں نے لکھا کہ اس وقت دہلی کی فضا میں زہر سرایت کرچکا ہے اور ہر سانس کے ساتھ لوگوں کی صحت کو خطرہ بڑھتا جا رہا ہے۔ بی جے پی حکومت کو اس کا جواب دینا ہوگا اور آلودگی کے خلاف صرف بیانات نہیں بلکہ ٹھوس کارروائی کرنی ہوگی۔ سابق میئر نے آلودہ ہوا کے انسانی صحت پر پڑنے والے اثرات پر تشویش ظاہر کرتے ہوئے خاص طور پر بچوں اور بزرگوں کا ذکر کیا۔ انہوں نے کہا کہ دہلی کو کھوکھلے دعووں کی نہیں بلکہ صاف ہوا کی ضرورت ہے۔ بچوں اور بزرگوں کو اس زہریلی فضا میں کن مشکلات کا سامنا کرنا پڑ رہا ہوگا، اس پر بھی غور کیا جانا چاہیے۔
ادھر مرکزی آلودگی کنٹرول بورڈ (سی پی سی بی) کے اعداد و شمار کے مطابق پیر کی صبح دہلی کے بعض علاقوں میں فضائی آلودگی ’شدید‘ زمرے میں پہنچ گئی۔ شہر کے کئی حصوں میں اسموگ کی موٹی تہہ چھائی رہی، جس کے باعث صبح کے وقت حدِ نگاہ متاثر ہوئی۔ اندرلوک کے علاقے میں بھی گھنی دھند دیکھی گئی۔ سی پی سی بی کے مطابق صبح تقریباً 4 بج کر 20 منٹ پر آئی ٹی او کے مانیٹرنگ اسٹیشن میں اے کیو آئی 406 ریکارڈ کیا گیا، جو ’شدید‘ زمرے میں آتا ہے۔ دوسری جانب راجدھانی کے کئی اہم علاقے ’انتہائی خراب‘ فضائی معیار کی زد میں رہے۔ راجیو چوک میں رات ڈیڑھ بجے اے کیو آئی 381، جبکہ ساؤتھ ایکسٹینشن کے اطراف صبح 4 بجے 360 ریکارڈ کیا گیا۔
شائع شدہ: پیر, 9 نومبر، 2026 | 11:21 AM IST