سنجے سنگھ کا کانگریس پر جوابی حملہ: بی جے پی کی اصل بی ٹیم کانگریس ہے

نئی دہلی: 5 نومبر(ایس ایم نیوز) عام آدمی پارٹی نے کانگریس کے قومی صدر ملکارجن کھڑگے کی جانب سے پارٹی پر لگائے گئے بے بنیاد الزامات کا جواب دیا ہے۔ آپ کے راجیہ سبھا رکن سنجے سنگھ نے ملکارجن کھڑگے کو جواب دیتے ہوئے کہا کہ بی جے پی کی اصل بی ٹیم کانگریس ہے۔ کانگریس نے پورے ملک میں بی جے پی کی حکومتیں بنوانے کا جرم کیا ہے۔ اروناچل پردیش، اتراکھنڈ، گوا، کرناٹک اور مدھیہ پردیش میں کانگریس کے اراکین اسمبلی نے ہی بی جے پی کی حکومتیں بنوائیں۔ اتر پردیش، بہار، گجرات سمیت کئی ریاستوں میں کانگریس کئی دہائیوں سے انتخابی شکست کا سامنا کر رہی ہے، اس وقت تو آپ کا وجود بھی نہیں تھا۔ انہوں نے کہا کہ عام آدمی پارٹی پر انگلی اٹھانے کے بجائے کانگریس کو اپنا محاسبہ کرنا چاہیے۔ وزیر اعلیٰ بھگونت مان نے پنجاب کے عوام کے لیے کام کیا ہے اور 2027 میں ایک بار پھر بھاری اکثریت سے حکومت بنائیں گے۔جمعرات کو پریس کانفرنس سے خطاب کرتے ہوئے آپ کے راجیہ سبھا رکن سنجے سنگھ نے کہا کہ پنجاب کی ریلی میں کانگریس پارٹی کے قومی صدر ملکارجن کھڑگے نے کہا تھا کہ عام آدمی پارٹی، بی جے پی کی بی ٹیم ہے۔ لیکن حقیقت یہ ہے کہ مشرق سے مغرب اور شمال سے جنوب تک کانگریس پارٹی نے کئی مرتبہ بی جے پی کی حکومتیں بنوانے کا کام کیا ہے۔سنجے سنگھ نے اعداد و شمار پیش کرتے ہوئے بتایا کہ 2016 میں اروناچل پردیش کے عوام نے کانگریس کو کامیابی دلائی، لیکن پوری کانگریس پارٹی اور اس کے اراکین اسمبلی بی جے پی میں شامل ہو گئے اور وہاں بی جے پی کی حکومت بنوا دی۔ اسی سال 2016 میں اتراکھنڈ میں کانگریس کے 9 اراکین اسمبلی بی جے پی میں چلے گئے اور اس کی حکومت بنوانے میں مدد کی۔ 2017 میں گوا میں کانگریس کے 13 اراکین اسمبلی بی جے پی میں شامل ہو گئے۔ 2019 میں کانگریس کے 13 اراکین اسمبلی بی جے پی میں چلے گئے اور کرناٹک میں اس کی حکومت بنوا دی۔ 2020 میں مدھیہ پردیش میں کانگریس کے 22 اراکین اسمبلی بی جے پی میں شامل ہو گئے اور وہاں بی جے پی کی حکومت بنوا دی۔ 2022 میں ایک بار پھر گوا میں کانگریس کے 8 اراکین اسمبلی پارٹی چھوڑ کر بی جے پی میں چلے گئے۔سنجے سنگھ نے مزید کہا کہ پورے ملک میں کانگریس پارٹی اور اس کے اراکین اسمبلی ٹوٹ ٹوٹ کر بی جے پی میں شامل ہوتے رہے ہیں اور اس کی حکومتیں بنواتے رہے ہیں، لیکن اب وہ ہم سے سوال کر رہے ہیں۔ آپ وہ پارٹی ہے جس کے بڑے رہنما اروند کیجریوال، سابق وزیر تعلیم منیش سسودیا اور سابق وزیر صحت ستیندر جین بی جے پی سے لڑتے ہوئے جیل گئے اور میں بھی جیل گیا۔ انہوں نے کانگریس سے سوال کیا کہ وہ اپنے ایسے چار رہنماؤں کے نام بتائے جو بی جے پی سے لڑتے ہوئے جیل گئے ہوں۔

شائع شدہ: جمعہ, 6 نومبر، 2026 | 12:15 AM IST