نئی دہلی: 12 نومبر،راجدھانی دہلی میں بڑھتی فضائی آلودگی کے خلاف طلبہ اور نوجوانوں کی جانب سے نکالے گئے احتجاجی مارچ کو بدھ 11 نومبر 2026 کی شام دہلی پولیس نے ترکمان گیٹ کے قریب روک دیا۔ مظاہرین رام لیلا میدان سے جنتر منتر تک مارچ نکالنا چاہتے تھے، لیکن انتظامیہ کی اجازت نہ ہونے کا حوالہ دیتے ہوئے پولیس نے مارچ کے ابتدائی مقام سے تقریباً 300 سے 400 میٹر کی دوری پر ہی بیریکیڈنگ لگا کر انہیں آگے بڑھنے سے روک دیا۔
مظاہرین نے ابتدا میں رام لیلا میدان سے جنتر منتر تک مارچ نکالنے کا اعلان کیا تھا۔ بدھ کی شام تقریباً 4:30 بجے طلبہ اور نوجوانوں نے ترکمان گیٹ سے مارچ شروع کیا، لیکن کچھ ہی دور آگے بڑھنے پر پولیس نے انہیں روک دیا۔اخبار دی ہندو کی رپورٹ کے مطابق، مارچ کو روکنے کے لیے دہلی پولیس اور مرکزی ریزرو پولیس فورس (سی آر پی ایف) کے جوانوں نے سڑک کے دونوں جانب بھاری بیریکیڈنگ کر رکھی تھی۔ پولیس حکام کا کہنا تھا کہ منتظمین کے پاس اس راستے پر احتجاج کرنے کی سرکاری اجازت نہیں تھی۔پولیس کی جانب سے آگے بڑھنے سے روکے جانے کے بعد مظاہرین نے اسی مقام پر بیٹھ کر پُرامن دھرنا جاری رکھا۔ اس دوران پولیس نے کسی بھی مظاہرہ کرنے والے کو حراست میں نہیں لیا۔
اس احتجاجی مارچ کا مشترکہ طور پر انعقاد ریوولیوشنری ورکرز پارٹی آف انڈیا (آر ڈبلیو پی آئی)، دِشا اسٹوڈنٹس آرگنائزیشن، نوجوان بھارت سبھا، سائنٹسٹس فار سوسائٹی اور استری مکتی لیگ نے کیا تھا۔مظاہرین نے دیوالی کے بعد دہلی کی ہوا کے معیار کے انتہائی خراب زمرے میں پہنچنے پر تشویش ظاہر کی۔ ان کا مطالبہ تھا کہ صنعتی اخراج، تعمیراتی سرگرمیوں سے اڑنے والی دھول اور گاڑیوں سے ہونے والے فضائی آلودگی پر سختی سے قابو پایا جائے۔
اخبار دی ڈیلی پاینیر کی رپورٹ کے مطابق، احتجاجی مارچ شروع ہونے سے چند گھنٹے پہلے پولیس شمال مشرقی دہلی کے کراول نگر میں واقع آر ڈبلیو پی آئی کے دفتر بھی پہنچی تھی۔ اس دفتر میں بچوں کے لیے ایک لائبریری بھی موجود ہے۔پولیس حکام نے واضح کیا تھا کہ وہ منتظمین کو صرف یہ اطلاع دینے گئے تھے کہ مقررہ مقامات کے علاوہ کسی دوسری جگہ احتجاج کرنے کی اجازت نہیں ہے۔دہلی میں مسلسل خراب ہوتی فضائی آلودگی کے درمیان طلبہ اور نوجوانوں کا یہ احتجاج ایک بار پھر آلودگی پر قابو پانے کے لیے مؤثر اقدامات کی ضرورت کو اجاگر کرتا ہے۔ مظاہرین نے حکومت سے مطالبہ کیا کہ فضائی آلودگی کے اسباب کو دور کرنے کے لیے ٹھوس اور سخت اقدامات کیے جائیں۔
شائع شدہ: جمعرات, 12 نومبر، 2026 | 11:31 AM IST