قرآن ہدایت اور رحمت کا ذریعہ ہے:مولانا اخلاق الرحمٰن 

دریاباد،بارہ بنکی،قرآن کریم ہدایت اور رحمت کا ذریعہ ہے۔قرآن اتنی بابرکت اور مہتم بالشان کتاب ہے کہ اس کے بغیر اسلام نامکمل ہے،قرآن میں اللہ نے انسان کو زندگی گزارنے کے اصولوں سے روشناس کروایا ہے۔ہم قرآن پر عمل کر کے ہی دنیا و آخرت کی نعمت سے آراستہ ہوسکتے ہیں مذکورہ خیالات کا اظہار مولانا اخلاق الرحمٰن نے مدرسہ اسلامیہ محمدیہ محمد پور میں ناظرہ قرآن مکمل ہونے پر منعقد دعائیہ تقریب سے خطاب کرتے ہوئے کیا۔

انہوں نے کہا کہ آج سب سے زیادہ قرآن پاک کی تعلیم اور اس کے پیغام کو عام کرنے اور اس کے مقصد کو سمجھنے اور سمجھانے کی ضرورت ہے۔مولانا نے کہا کہ قرآن کریم کی نمایاں خصوصیت یہ ہے کہ اسے پڑھنے اور حفظ کرنے والے بڑی عمر کے ساتھ انتہائی چھوٹی عمر کے بھی ہوتے ہیں اور بعض تو اتنی کم عمر کے بچے پورے قرآن کریم کو پڑھنے کا شرف حاصل کر لیتے ہیں کہ جس عمر میں کسی اور کتاب کے پڑھے جانے کے بارے میں تصور کرنا بھی محال ہوتا ہے۔

حافظ اخلاق کی زیر نگرانی ناظرہ قرآن مکمل کرنے والے ابوبکر بن راحت اللہ،محمد ایان بن شمس الدین،ذیبا خاتون بنت محمد آصف،خنسہ خاتون بنت اخلاق الرحمٰن،ام کلثوم بنت سہیل کو موجود معززین نے گلپوشی کر کے دعاؤں سے نوازا اور نیک خواہشات کا اظہار کیا۔اس موقع پر گاؤں کے کثیر تعداد میں لوگ موجود تھے۔