نئی دہلی: ایودھیا کے رام مندر میں عقیدت مندوں کی جانب سے دیے گئے چندے میں مبینہ خرد برد کے معاملے پر کانگریس نے ایک بار پھر بھارتیہ جنتا پارٹی (بی جے پی) کو نشانے پر لیا ہے۔ کانگریس جنرل سکریٹری جے رام رمیش نے کہا کہ ’’چوری چھپتی نہیں، کسی نہ کسی طرح قلعی کھل ہی جاتی ہے۔‘‘ انہوں نے اس معاملے کو عقیدت اور عوامی اعتماد سے جڑا سنگین مسئلہ قرار دیا۔
جے رام رمیش نے پیر کے روز سوشل میڈیا پلیٹ فارم ایکس پر اپنے بیان میں الزام لگایا کہ رام مندر کے چندے میں مبینہ بے ضابطگیوں سے متعلق روزانہ سامنے آنے والے انکشافات کئی اہم سوالات کھڑے کر رہے ہیں۔ انہوں نے مطالبہ کیا کہ پورے معاملے کی جانچ کے لیے ایک نئی اور آزاد خصوصی تحقیقاتی ٹیم (SIT) تشکیل دی جائے، جو براہ راست سپریم کورٹ کو رپورٹ پیش کرے۔
کانگریس لیڈر نے سوال اٹھایا کہ جب سپریم کورٹ کی ہدایت پر تحقیقات ہو رہی تھیں تو پہلی ایس آئی ٹی کی حیثیت کیا تھی؟ اگر پہلی ٹیم نے باقاعدہ تفتیش نہیں کی تھی تو پھر اس کی ابتدائی رپورٹ کی بنیاد پر شری رام جنم بھومی تیرتھ کھیتر ٹرسٹ نے 6 جولائی کو ٹرسٹ کے جنرل سکریٹری چمپت رائے کو کلین چٹ کیسے دے دی؟
انہوں نے یہ بھی سوال کیا کہ پہلی اور دوسری ایس آئی ٹی میں ایک ہی سینئر پولیس افسر کی موجودگی کیوں رہی اور تحقیقاتی رپورٹس ٹرسٹ کو کس اختیار کے تحت فراہم کی گئیں؟
کانگریس کے تین اہم مطالبات
جے رام رمیش نے حکومت سے مطالبہ کیا کہ پہلی ایس آئی ٹی کی تشکیل سے متعلق نوٹیفکیشن اور اس کے دائرۂ کار کو عوام کے سامنے لایا جائے۔ اس کے علاوہ پہلی ٹیم کی عبوری اور حتمی رپورٹ بھی عام کی جائے اور یہ واضح کیا جائے کہ یہ رپورٹس کس کے حکم پر ٹرسٹ کو فراہم کی گئیں۔
کانگریس نے مطالبہ کیا ہے کہ سپریم کورٹ کی نگرانی میں نئی آزاد ایس آئی ٹی تشکیل دی جائے، جو صرف چندہ گنتی کے مرکز تک محدود رہنے کے بجائے ٹرسٹ کے مالیاتی نظام اور انتظامی ذمہ داران کے کردار کی بھی جانچ کرے۔
کیا ہے پورا معاملہ؟
واضح رہے کہ رام مندر میں چندے کی گنتی کے دوران مبینہ خرد برد کا معاملہ سامنے آیا تھا۔ تحقیقاتی ٹیم کی چارج شیٹ کے مطابق چندہ گنتی کے مرکز سے نقد رقم نکالنے یا چھپانے کے 105 واقعات سی سی ٹی وی فوٹیج میں سامنے آئے۔ اس معاملے میں آٹھ افراد کو ملزم بنایا گیا ہے۔
دوسری جانب سپریم کورٹ نے 2 نومبر کو چارج شیٹ داخل ہونے کے بعد آزادانہ سی بی آئی جانچ کا مطالبہ کرنے والی عرضیوں کو نمٹا دیا تھا اور واضح کیا تھا کہ اس نے معاملے کے میرٹ پر کوئی رائے نہیں دی ہے۔
کانگریس کا کہنا ہے کہ رام مندر کروڑوں لوگوں کی عقیدت کا مرکز ہے اور عقیدت کے نام پر ملنے والے ہر روپے کا حساب عوام کے سامنے ہونا چاہیے۔ پارٹی نے وزیر اعظم نریندر مودی کی خاموشی پر بھی سوال اٹھائے ہیں۔
— سیاسی منظر | ویب ڈیسک
شائع شدہ: پیر, 16 نومبر، 2026 | 2:03 PM IST

