بی جے پی رہنما راٹھور کے گھر انکم ٹیکس چھاپہ ان کے پارٹنر راجیش کیسروانی کے بیڑی کاروبار میں ٹیکس چوری کی تحقیقات کے سلسلہ میں کیا گیا
بھوپال،11جنوری،محکمہ انکم ٹیکس نے مدھیہ پردیش کے ساگر ضلع میں ایک سابق ایم ایل اے کے گھر پر چھاپہ ماری کی۔ اس دوران بی جے پی رہنما ہرونش سنگھ راٹھور کے گھر سے سونا، کروڑوں روپے نقد اور بے نامی امپورٹیڈ کاروں کے علاوہ ایسی چیز ملی جس کو دیکھ کر انکم ٹیکس کی ٹیم حیران رہ گئی۔ سابق ایم ایل اے کے گھر کے اندر تالاب تھا جس میں 4 مگرمچھ پائے گئے۔این ڈی ٹی وی کی رپورٹ کے مطابق یہ چھاپہ ماری راٹھور کے کاروباری پارٹنر راجیش کیسروانی کے بیڑی کاروبار میں ٹیکس چوری کے الزامات کو لے کر کی گئی تھی۔ راٹھور ساگر ضلع میں پرانے رہنما ہیں اور 2013 میں ایم ایل اے منتخب ہوئے تھے۔ ان کے والد ہرنام سنگھ راٹھور مدھیہ پردیش کے وزیر بھی رہ چکے ہیں۔ انکم ٹیکس افسر کیسروانی اور ان کے معاونین سے جڑے ٹھکانوں پر گزشتہ کچھ دنوں سے چھاپہ ماری کر رہے ہیں۔رپورٹ میں کہا گیا ہے کہ جمعہ کو چھاپہ ماری کے دوران افسروں نے احاطہ کے اندر بنے ایک تالاب میں 4 مگرمچھ دیکھے۔ انہوں نے اس کی اطلاع محکمہ جنگلات کو دی۔ مدھیہ پردیش کے فاریست فورس کے سربراہ اسیم شریواستو نے مگرمچھ ملنے کی تصدیق کرتے ہوئے بتایا کہ انہیں بحفاظت تحویل میں لیتے ہوئے وائلڈ لائف پروٹیکشن ایکٹ کے تحت ملزمین کے خلاف مقدمہ درج کر لیا گیا ہے۔ انہوں نے کہا کہ برآمد کیے گئے مگرمچھوں کی صحت کی جانچ بھی کی جا رہی ہے۔ حالانکہ انہوں نے یہ بتانے سے انکار کیا کہ مگرمچھ کس کے گھر سے ملے ہیں۔این ڈی ٹی وی کی رپورٹ کے مطابق ابھی تک 155 کروڑ روپے کی ٹیکس چوری کا انکشاف ہوا ہے۔ 3 کروڑ روپے نقد، سونا، چاندی وغیرہ بھی برآمد کیا گیا ہے۔ یہ بھی بتایا گیا ہے کہ سابق ایم ایل اے کی ہی 140 کروڑ روپے کی ٹیکس چوری پکڑی گئی ہے جو کنسٹرکشن کا کاروبار بھی کرتے ہیں۔
