نئی دہلی، 23 جنوری: دہلی ریاستی کانگریس صدر اور بادلی اسمبلی حلقہ سے کانگریس پارٹی کے امیدوار دیویندر یادو کا انتخابی مہم زور وشور سے جاری ہے۔ آج بادلی گاؤں میں انہوں نے ایک بڑی ریلی سے خطاب کیا اور لوگوں سے آشرواد حاصل کیا۔ اس موقع پر وہاں موجود تمام لوگوں نے ہاتھ اٹھا کر کانگریس کی حمایت کی اور پانچ فروری کو کانگریس پارٹی کو کامیاب بنانے کا عزم کیا۔ کانگریس صدر نے لوگوں سے خطاب کرتے ہوئے کانگریس کی پانچ گارنٹیوں کا ذکر کیا اور کہا کہ کانگریس کی حکومت بنتے ہی پہلی کابینہ کی میٹنگ میں ان پانچوں گارنٹیوں کو نافذ کردیا جائے گا۔ انہوں نے کہا کہ یہ صرف پانچ گارنٹیاں ہی نہیں ہیں بلکہ دہلی کے عوام کی خوشحال اور مہنگائی کم کرنے کی گارنٹی ہے۔ انہوں نے وہاں موجود لوگوں کا شکریہ ادا کیا اور ایک بار پھر بادلی میں اور ریاست بھر میں لوگوں سے کانگریس کے حق میں ووٹ کرنے کی اپیل کی۔
